Featured

-Irma De Flore-ს ქალბატონი, ის არის მუზა და პოეტი ერთდროულად!

როდესაც საქმე ნებისმიერი განხრის წმინდა ხელოვნებასთან  გვაქვს, უნებლიედ ყალიბდება კრედო, რომლის მთავარი არსი მცირე დოზით მაინც ატარებს პერფექციონისტურ ხასიათს – მაღალი სტანდარტებისადმი შესატყვისობა ან სრული კრახი. არჩევანი კი თქვენზეა. ინსპირაციისა და იდეის წარმატებული ხორცშესხმა სწორედ საყვარელი საქმისადმი სერიოზული დამოკიდებულებითა და დიდი სიყვარულით მიიღწევა.

სიყვარული სინათლეა, რომელიც ცხოვრების სახიფათო ბილიკებს გვინათებს და გვჩუქნის თავისუფლებას. ხელოვნების თავისუფლებას…“

სწორედ ეს გახლავთ ვიზუალური არტისტის, ირმა შარიქაძის დევიზი, სადაც სიყვარული და თავისუფლება პირდაპირკავშირშია ხელოვნების შესაქმნელად.
მისი პირველი ნაბიჯები ფოტოგრაფიიდან იწყება, დღესდღეობით ირმა წარმატებული დიზაინერია და ბრენდს „Irma De Flore” წარმოადგენს.
მისთვის არ არსებობს არანაირი ფორმულა, ყველაფერი დამყარებულია შინაგან შეგრძნებებსა და ინტუიციაზე.
შთამბეჭდავია დიზაინერის უკიდეგანო ფანტაზიის უნარი და მდიდარი ფერთა პალიტრა სამოსის დიზაინში, რომელიც ბრენდის იდენტიფიცირებას მარტივად ახდენს.

Irma de Flore’s S/S 2016 fashion performance “Imaginery Garden” inspired by Frida Kahlo 

ყოველთვის დასამახსოვრებელია „Irma De Flore”-ს პერფომანსები ორიგინალური თემატიკითა და შთაგონებით. ასევე აღსანიშნავია ბრენდის კონცეფცია, რომელიც „Luxury” ხაზს წარმოადგენს და გეტყვით, თითზე ჩამოსათვლელია ქართველი დიზაინერები, რომლებიც მუშაობენ სამოსის უმაღლეს კლასზე და მას წარმატებით ართმევენ თავს.
საქმისადმი სიყვარული და ინდივიდუალურობა მკვეთრად იგრძნობა ტანსაცმლის თითოეულ დეტალში. ალბათ, ამიტომაც მოიპოვა ბრენდმა მალევე პოპულარობა და საზოგადოების სიყვარული. ფაქტი კი სახეზეა, ქიმია ნამდვილად შედგა კრეატივისა და მაღალი სტანდარტებისადმი შესატყვისობის შორის.

ირმა შარიქაძის შემოქმედებაში უდიდეს როლს ინსპირაცია თამაშობს. მისთვის ეს უკანასკნელი არ არის მხოლოდ რაიმე კონკრეტული, როგორც დიზაინერი ამბობს, ინსპირაცია შეიძლება იყოს როგორც მატერიული, ასევე ჩვენი ცნობიერის მიღმა აღბეჭდილი ცხოვრებისეული ფრაგმენტებიც. მისთვის შთამაგონებელი შეიძლება იყოს აყვავებული ყვავილის ტოტი, მზის ამოსვლა გარიჟრაჟზე, ან უცნობი ქალის ძველი ფოტო.
ეს ყველაფერი კი მშვენიერების ესთეტიკურ აღქმასა და სილამაზის ძიებას უკავშირდება.

„თუ ხარ მზად,იმისთვის, რომ მიიღო ინსპირაცია ის აუცილებლად მოვა, თან მოულოდნელი ფორმით“ – ირმა შარიქაძე


მოგვიყევით კარიერის პირველ ეტაპზე, რამ განაპირობა თქვენი ინტერესი ფოტოგრაფიის ხელოვნებაში?
16 წლის ასაკში აღმოვაჩინე ფოტოგრაფიის საოცარი სამყარო. მახსენდება პირველი გადაღება, პირველი ფირი, ძველი თბილისი,რომელსაც მონდომებით ვიღებდი ნაჩუქარი ზენიტით. მახსოვს, მაშინ მსახიობობაზე ვოცნებობდი, ვსწავლობდი თოიძის სამხატვრო სასწავლებელში და პარალელურად პანტომიმის თეატრშიც. მახსოვს, რომ შუქი ხშირად არ იყო და არც ფოტოგრაფიის პროფესიონალურად შესწავლის შანსი მქონდა. მითუმეტეს, ფოტოგრაფი ქალიც კი არ არსებობდა იმ პერიოდში, მაგრამ ამ გამოწვევას არ შევუშინებივარ, უფრო დიდი სტიმული მომცა, რომ ყველაფერს შევძლებდი.

რატომ ხელოვნება?
ხელოვნება ჩემთვის მთავარი სასიცოცხლო მოტივაცია და თვითგამოხატვის საშუალებაა.მის გარეშე ცხოვრება აზრს კარგავს. არ არსებობს ხელოვნება უპირობო სიყვარულის გარეშე, ხელოვნება  თვითშემეცნებით, ინტუიციით, ხელოვნების, ცხოვრებისა და ადამიანების სიყვარულით იწყება.

რა როლი გაქვთ როგორც ხელოვანს საზოგადოების წინაშე?
ჩემი როლი საზოგადოების წინაშე არის ადამიანის, რომელიც ცდილობს ჭეშმარიტი სილამაზის პოვნას, მასთან შეხებასა და მიახლოვებას. ჩემი აზრით, ოცდამეერთე საუკუნეში არ არის საკმარისი ერთ სახელოვნებო სფეროში მოღვაწეობა, შესაბამისად, არტისტი თავის სათქმელს სხვადასხვა ჟანრის, ვიზუალური ხელოვნების სინთეზით ბევრად შთამბეჭდავად გამოხატავს. ჩემი საავტორო პროექტების ფარგლებში ფოტოგრაფიასთან ერთად ყოველთვის ვქმნიდი ვიდეოს, ინსტალაციასა და კოსტუმს. ნებისმიერი ხელოვანისთვის და განსაკუთრებით ჩემთვის მნიშვნელოვანია საზოგადოებამდე სიღრმისეულად მიიტანო სათქმელი, შეეხო ადამიანის გულს.

რამ განაპირობა თქვენი დაინტერესება სამოსის დიზაინში?
ყოველთვის მაინტერესებდა სამოსის დიზაინი, ხშირად ვქმნიდი კოსტუმს ჩემი გადაღებებისთვისა და გამოფენებისთვის, თუმცა ყველაფერი ანტიკვარული ქსოვილების, მაქმანების, სამკაულებისა და აქსესუარების კოლექციონერობით დაიწყო. მოდის სამყარო ყოველთვის მიმზიდველი იყო ჩემთვის და განსაკუთრებულ ლტოლვასაც იწვევდა, მაგრამ ეს ნაბიჯი გააზრებულად გადავდგი როცა ამ ეტაპისთვის მზად ვიყავი.

ირმა, ყოველთვის ძვირფას ქსოვილებს იყენებთ კოლექციის შესაქმნელად, რამდენად მისაღები ფასებია მომხარებლისთვის?
ყოველთვის მნიშვნელოვანია შეხება. მიყვარს ნატურალური ქსოვილები: აბრეშუმი, ბარხატი, ფარჩა, თავს განსაკუთრებულად კომფორტულად გრძნობ, როცა მაღალი ხარისხის აბრეშუმის კაბა და კიმონო გაცვია. Irma De Flore-ს ქურთუკებსაც კი ნატურალური აბრეშუმის სარჩული აქვთ. ყველაფრის ტესტირებას პირადად ვაკეთებ, ვლინდება რამდენად პრაქტიკულია ან კომფორტულია ნებისმიერი მოდელი, რადგან ძალიან პრეტენზიული ვარ, როგორც მომხარებელი. თამამად შემიძლია ვთქვა, რომ ქალბატონებს მხოლოდ საუკეთესოს ვთავაზობ. ყოველთვის ვცდილობდი კაბა, რომელიც მეცვა განსაკუთრებული ყოფილიყო. ტენდენციების ზედმიწევნით გათვალისწინება მოსაწყენია. ღირებულებას რაც შეეხება ვფიქრობ, „Luxury“ კლასთან მიმართებით Irma De Flore-ს ფასები, რა თქმა უნდა, საკმაოდ დაბალია.

როგორ აბალანსებთ კრეატივს ბიზნესთან ერთად?
რთულია, თუმცა შესაძლებელი, მნიშვნელოვანია გამოცდილება.

Irma De Flore-ს ქალბატონი…
Irma De Flore-ს ქალბატონი პირველ რიგში გაბედულია. მას არ ეშინია ფერების მდიდარი პალირტის გამოყენების, შეუძლია მოირგოს განსხვავებული სტილის სამოსი: ელეგანტური, ეკლექტიკური, ბოჰემური…
ამ ქალბატონის ხიბლი მრავალფეროვნებაშიც მდგომარეობს, ის უგუნებელყოფს შაბლონურ ტრენდებს, შეუძლია ყოველდღიურობაში იყოს მომხიბვლელი და შთამაგონებელი. მას უყვარს ანტიკვარული სამკაულები, ექსპერიმენტები, თუმცა, ის არასდროს არის გადატვირთული. Irma De Flore-ს ქალბატონს შეუძლია ჰარმონიის შექმნა საკუთარ თავთან, რომელიც ბედნიერებას ანიჭებს. ის არის მუზა და პოეტი ერთდროულად!


რასთან ასოცირდება თქვენთვის ფერების სინთეზი?
კოსმოსთან. სამყარო, რომელშიც ვცხოვრობთ დიდი შემოქმედია წარმოუდგენელი წარმოსახვის დიაპაზონითა და მასშტაბით. ვფიქრობ, ადამიანები, რომლებიც ფერთან მუშაობენ უფრო მგრძნობიარეები არიან.

ცხოვრებისეული სიტუაცია, რომელიც თქვენი შემოქმედების ინსპირაციად იქცა…
ჩემი შვილის დაბადება დღემდე რჩება ჩემი შემოქმედების მთავარ ინსპირაციად.
ასევე განსაკუთრებულად შთამაგონებელი აღმოჩნდა გენიალური მექსიკელი მხატვარი, ფრიდა კალო, რომელმაც დიდი გავლენა მოახდინა ჩემზე. ფრიდა, საერთაშორისო პროექტი „წერილების“  გარდა, ერთ-ერთი პერფომანსისა და კოლექციის ინსპირაციაა. ტანგოს კვალი კი წარუშლელია ჩემს ცხოვრებასა და შემოქმედებაშიც, ხშირად ვამბობ, რომ ტანგოს მუსიკა ჩემი ცხოვრების „საუნდტრეკია“, მისი ინსპირაციით დადგმული სპექტაკლი-პერფომანსი „ვარდების ტანგო“ წარმატებით შედგა მოდის კვირეულზე და დიდი მოწონებაც დაიმსახურა საერთაშორისო თეატრალური ფესტივალი „საჩუქარი“-ს ფარგლებშიც, თუმცა ყველაფერი აქ არ მთავრდება, ბუენოსაირესი წინ არის….

თქვენი
  კიმონოები მალევე მოხვდა მსოფლიო მოდის ეპიცენტრში, ვიხილეთ ისეთ გავლენიან გამოცემებში, როგორებიცაა Vogue, Le21Eme  და ა.შ. ელოდით ასეთ გამოხმაურებას?  თვლით თუ არა, რომ  ეს სტიმულის მომცემი იყო  მეტი თამამი ნაბიჯებისთვის მოდის ინდუსტრიაში?
რა თქმა უნდა, იყო. მერსედეს-ბენცის მოდის კვირეულის ყველაზე საპატიო სტუმარმა, ცნობილმა ბრიტანელმა ფიგურამ მოდის სფეროში, ჰილარი ალექსანდრმა კოლექციის ერთ-ერთი კაბა და კიმონო ჩვენების დასრულებისთანავე შეიძინა. სპეციალური დაკვეთით შეიკერა კიმონო თიკა კანდელაკისთვის. სულ რამდენიმე დღის წინ, ქსენია სობჩაკმა გამოაქვეყნა ფოტო, სადაც არაჩვეულებრივი ყვითელი კიმონო აცვია.
ამ სეზონზეც მოვხვდით გავლენიან პორტალებსა და გამოცემებში. ბევრი ცნობილი ქალბატონის კარადაში, როგორც საქართველოში, ისე მის ფარგლებს გარეთ  “Irma de Flore” -ს კიმონო განსაკუთრებულ ადგილს იკავებს. დადებითი გამოხმაურება კი საერთაშორისო ასპარეზზე, სასიამოვნოა და ასევე მნიშვნელოვანიც.

რას გვეტყვით ახალი კოლექციის  შესახებ?
Irma de Flore-ეს შემოდგომა-ზამთარი 2017/18 კოლექცია მერსედეს-ბენცის მოდის კვირეულის ფარგლებში დახურული სალონური ჩვენებით, ძველი თბილისის ყველაზე ბოჰემურ რესტორანში, პურპურში ჩატარდა. ჩვენებას ფორტეპიანოზე ცოცხალ მუსიკალურ აკომპანიმენტს ცნობილი პიანისტი, ზურაბ ხუციშვილი უწევდა. ჩვენებას დაესწრენ კვირეულის სტუმრები, მსოფლიოს სხვადასხვა ქვეყნის გავლენიანი გამოცემების ჟურნალისტები, კრიტიკოსები და ბაიერები.
საუკუნის დასაწისით Belle Époque და Art Nouveau – თი შთაგონებულმა კოლექციამ სტუმრებზე დიდი შთაბეჭდილება მოახდინა.


კოლექცია ქალურ, ელეგანტურ სილუეტს უსვამს ხაზს.  გამოყენებულია ბარხატი, გობელენი და აბრეშუმის მაღალი ხარისხის ქსოვილები. პალტოები, ქურთუკები, კაბები და ჩანთები შემკულია ყვავილების ნაქარგობებით. კოლექცია მდიდარია ხელნაკეთი აქსესუარებით, ზამბახის „აბადოკებით“ და ბროშებით, ასევე ბისერებითა და ნაქარგი საყურეებით. მთავარი სიმბოლო ზამბახია, ბუნების ყველაზე ნატიფი და დახვეწილი ყვავილი, რომელიც ქალური ფორმებითა და ღრმა ფერთა გამით გამოირჩევა. Irma de Flore-ს  კოლექცია ხოტბას ასხავს დახვეწილ და ელეგანტურ ქალბატონს, Unisex მიმდინარეობისა და მუდმივი ცვლილებების  ეპოქაში.

This slideshow requires JavaScript.

10 წლის შემდეგ…
ვფიქრობ, 10 წლის შემდეგ აღარ ვიცხოვრებ თბილისში. შემოქმედებით მხარეს რაც შეეხება, მგონია, რომ უფრო მეტ ექსპერიმენტს და კოლაბორაციას გავაკეთებ, ახალ სახელოვნებო სფეროებს შევეხები. აუცილებლად გავაკეთებ ჩემს წიგნს, ფოტო ალბომს, რაზეც დიდი ხანია მეფიქრება. ფოტოგრაფია და მოდა ყოველთვის იქნება ჩემი ცხოვრების ნაწილი.
მიჭირს ცოტა პასუხის გაცემა, მაგრამ ვფიქრობ, 10 წლის შემდეგ უფრო მეტი თავისუფალი დროც მექნება სამოგზაუროდ; აუცილებლად წავალ მექსიკაში ფრიდა კალოს სახლ-მუზეუმის სანახავად და არგენტინაში, საუკეთესო მილონგებზე ტანგოს საცეკვაოდ.

© EIR
Data Alekseev

Advertisements

– მარიონეტებად ის საქმე გვაყალიბებს, რომელსაც მექანიკურად ვემსახურებით

ხშირია ისეთი ცხოვრებისეული სიტუაციები, როდესაც გზაჯვარედინზე გიწევს დგომა და სწორი მიმართულების არჩევა, საიდანაც გზას გააგრძელებ. თუმცა, მყარ და წარმატებულ ნაბიჯებს კალაპოტიდან ამოვარდნასა და მშვიდი დინების საპირისპირო მიმართულებით ცურვას ამჯობინებ. ამ დროს მარტოობა შეგიპყრობს, აზრებისა და ემოციების დასალაგებლად შენი ერთადერთი მეგზური წიგნი და მუსიკა გახდება. ამ სიტუაციაში კი უამრავი პრობლემა შეგექმნება, ბევრიც გაგაკრიტიკებს. ახლობლებისგან შენიშვნებს მიიღებ.
გეტყვიან, რომ უმადური ხარ, ცხოვრებაში, ის გხვდა წილად რაზეც სხვამ შეიძლება იოცნებოს. „ყველაფერი ხომ შედარებითა?! „ …
ამისთვის მზად უნდა იყოთ, ის რაც თქვენს თავს ხდება ტრაგედია არ არის, დრო არავის მოსმენაში დახარჯოთ.

თითოეული ნაბიჯის გადაგმისას ჩვენ ვართ საკუთარი თავის შემქმნელები, თუმცა, მარიონეტებად ის საქმე გვაყალიბებს, რომელსაც მექანიკურად ვემსახურებით.
ამ დროს შემოქმედებით შესაძლებლობებს ჩვენივე ხელით ვბლოკავთ, ვექცევით გავლენის ქვეშ, საიდანაც თავის დაღწევაზე ფიქრი თითქოს ზედმეტია.
დეტალების გაცნობიერების შემთხვევაში აუცილებლად მოგიწევთ ტაიმ-აუტის აღება, შემდგომ კი დროული იქნება სტარტი, ძალების მოკრეფვითა და ახალი შემართებით, რათა ყოველგვარი მიზან-საშუალებით შეიცნოთ საკუთარი თავი ფუნდამენტურად.
ხშირად მიფიქრია, თუ რატომ მაქვს უდიდესი ადრენალინის შეგრძნება, როდესაც ნიცშეს ფილოსოფიას ვითავისებ -„რაც არ კლავს, ის აძლიერებს“
პასუხი არც თუ ისე რთულია. უმეტეს შემთხვევაში, მძიმე წარსული ან უსიამოვნო რეალობა წარმატების უტყუარ საფუძველს ქმნის და შემოქმედებით ხედვას აყალიბებს.
აბსოლუტურად ყოველთვის, როდესაც გადაიღლები, ერთხელ მაინც გაგეფიქრება ცხოვრების აბსურდულობაზე. საკუთარ თავს მოაჩვენებ, რომ ბრძოლა არ ღირს, მაგრამ გეტყვით, ადამიანის არაცნობიერის შესაძლებლობები ყველაზე პროდუქტიული ასეთ სტრესულ სიტუაციებშია, ყველაზე მეტად ამ მომენტში ღირს ბრძოლა, არ დანებდე და გააგრძელე გზა, რომელსაც თავადვე შექმნი სხვისგან დამოუკიდებლად. გადაშალე ახალი ფურცელი და დაამარცხე ის სისუსტეები, რომლებიც გზღუდავენ. ზუსტად ამის შემდეგ გააცნობიერებ, რომ ყველაფერი ღირს იმად, რომ გაცურო გამარჯვების ტალღებში.

ყოველი პროექტისა თუ სტატიის დასრულებისას ვფიქრობ, არის წერა ჩემი საქმე, თუ ეს ერთადერთი შესაძლებლობაა სტერეოტიპების დამსხვრევისთვის, რომელსაც კალამი მაძლევს.
ამ კითხვაზე პასუხი ახლაც არ ვიცი. მეც კალაპოტიდან ამოვარდნილი პერსონა ვარ, რომელიც ეძებს საკუთარი თავის შეცნობისა და განვითარების გზებს, იზიარებს ნიცშეს ფილოსოფიას და თვლის, რომ გახდება საკუთარი თავის შემოქმედი, არ დასჯერდება ერთს და პირობას დებს, რომ შექმნის რეალობას რომლის მთავარი მამამოძრავებელი ძალა თქვენ იქნებით.

Cool Vibes from TFW

დღესდღეობით, ქართული ხელოვნება ისევე როგორც კულტურა, ფართო მასშტაბებით არის წარმოდგენილი ქვეყნის საზღვრებს გარეთ. ქართული მოდის ინდუსტრია კი მნიშვნელოვან ნაბიჯებს დგამს. ხშირად მიფიქრია, თუ რა შეიძლება ყოფილიყო წარმატების ფორმულა იმ ნიჭიერი ადამიანებისათვის, რომლებიც ჩვენ გარშემო ჩუმათ არსებობდნენ და ქმნიდნენ არაერთ კრეატიულ ნამუშევარს, რომელიც აუცილებლად უნდა ენახა საზოგადოების ფართო და კომპეტენტურ სპექტრს.

თბილისის მოდის კვირეული პირველია, რომელმაც უამრავი სახე აღმოაჩინა და მისცა მათ გასაქანი განვითარებისა და პოპულარიზაციისთვის.
იყო პირველი – ეს პრივიეგიაა, ასოცირდებოდე  წარმატების ფორმულასთან -უდიდესი პასუხისმგებლობა.
რიგით მე-15 მოდის კვირეულს არც ამჯერად უღალატია ფორმატისთვის და ძირითადი აქცენტი დამწყებ და ჩვენთვის ნაკლებად ცნობილ ნიჭიერ დიზაინერებზე გააკეთა.

კვირეულის განმავლობაში თბილისის მოდისა და კულტურის დაუვიწყარი შთაბეჭდილებები ისეთ საერთაშორისო პრესის წარმომადგენლებმა გაუზიარეს მსოფლიოს, როგორებიც არიან : VOGUE ITALIA, BRITISH VOGUE, W MAGAZINE, DUST MAGAZINE, ELLE.COM , WWD MAGAZINE და სხვ.  ასევე მინდა გითხრათ, რომ უკვე მეორე სეზონია TFW ტრადიციას ამკვიდრებს გახსნის დღესთან დაკავშირებით, რომ ეს დღე მთლიანად ქართული კულტურის ლეგენდებს დაუთმოს.
მე-14 სეზონზე ჩვენ ნინო რამიშვილის ვინტაჟ კოსტუმები ვიხილეთ ულამაზესი პერფომანსის სახით, რომელმაც მაყურებელის დიდი მოწონება დაიმსახურა. ვინ უნდა ყოფილიყო შემდეგი, თუ არა სოფიკო ჭიაურელი. ღვნინის ქარხანა N1 – ში წარმოდგენილი იყო პერფომანსი ვერის უბნის მელოდიებიდან და ინსტალაციები ფარაჯანოვის ფილმიდან “ბროწეულის ფერი” , სადაც სოფიკო ჭიაურელი თამაშობდა. თითქოს ერთი დღით გაცოცხლდა ყველაფერი, რაც ჭიაურელის სახელთან იყო დაკავშირებული და იდეამ მაყურებელიც უპირობოდ აღაფრთოვანა.

This slideshow requires JavaScript.

Photos – Sali Dundua / EIR & DYE

მინდა წარმოგიდგინოთ 3 დიზაინერი თბილისის მოდის კვირეულიდან, რომლებმაც განსაკუთრებული შთაბეჭდილება მოახდინეს ჩემზე.

ანი დათუკიშვილი.


TATANA .


მარიამ გვასალია


Photos – TFW

Everyday’s Runway street style during MB Fashion week Tbilisi

 ,,ყოველი დღე არის მოდური შოუ და მსოფლიო თქვენი პოდიუმი”

მოდის კვირეულის განმავლობაში, როდესაც დიზაინერები ახალ კოლექციებს გვთავაზობენ, პარალელურად ქუჩაში ნებისმიერ თგვენგანს ეძლევა საშუალება, ისეთი გავლენიანი ჟურნალების ფურცლებზე მოხვდეს, როგორებიცაა Vogue, Elle, Harpers Bazaar და სხვ.
ამ შემთხვევაში მთავარია სტილი და ინდივიდუალიზმი.

5177884_tbilisi-fashion-week-fw17-street-style-photos-31_-_Copyმოდის ყველა კრიტიკოსი აღიარებს, რომ რეალური სტილის დასაბამი არის ქუჩა. კვირეულის განმავლობაში თავს იყრიან ცნობილი მოდის კრიტიკოსები, ბლოგერები, ჟურნალისტები, ისინი გვკარნახობენ თუ რა ჩავიცვათ და როგორი სტილი იქნება ტენდენციური შესაბამის სეზონზე. საქართველოს სახელი დიდი გავლენით სარგებლობს ქვეყნის ფარგლებს გარეთ. ქუჩის მოდის თვალსაზრისით, არც წელს იყო შეუმჩნეველი მოდაზე შეყვარებული ქართველების სტილი, რომელიც ყოველთვის დიდ აღტაცებას იწვევს უცხოელი სტუმრებისთვის თავისი დამახასიათებელი, კულტურულ ტრადიციებში მოქცეული ტენდენციებით. წლევანდელი მოდის კვირეულის ქუჩის სტილში აქტუალურობა არ დაუკარგავს 90-იანების გავლენას და ანდერგრაუნდ კულტურას მოდაზე.

ჩვენ დავაფიქსირეთ Vetements-ის ჯინსის, როგორც კლასიკური, ასევე სპორტული ინტერპრეტაციები. 2017 წლის ტენდენციები გვკარნახობენ, რომ ამ სეზონის მთავარი აქცენტები ნათელ ფერებსა და ნატურალურ ქსოვილებზე უნდა გავაკეთოთ. თუმცა, ასევე შეგხვდება ლუქები, რომელიც მთლიანად შავ ფერშია გადაწყვეტილი და მინიმალიზმისა და ელეგანურობის გარანტს გვთავაზობენ.
შეუმჩნეველი არც თეთრი პერანგი დაგრჩებათ, რომელიც სისადავით არის გამორჩეული და ყოველთვის პოპულარულია წლის ნებისმიერ სეზონზე, მაგრამ დღესღეობით მის “Oversize” ფორმას როგორც ტრენდი ისე ვხვდებით.

ალტერნატიული მიმართულების დღევანდელ მოდაში ხშირად ფიგურირებს პროტესტული მნიშვნელობის მესიჯები.
ტექსტი იქნება თუ უბრალოდ პრინტი სამოსზე, ეს აუცილებლად მიიპყრობს თქვენს ყურადღებას და დაგაფიქრებს. ბოლო სეზონებია სოციალური თემატიკის ტენდენცია მჭიდროდ დამკვიდრდა მოდაში და უამრავი მიმდევარიც გამოუჩნდა.

ბომონდი გთავაზობთ საუკეთესო ქუჩის სტილს მერსედეს-ბენც თბილისის მოდის კვირეულიდან, რომლითაც აუცილებლად იხელმძღვანელებთ.
არ არის საჭირო მოდის ყველა ტენდენციის დაცვა, აირჩიეთ სტილი რომელიც თქვენთვის ახლო და კომფორტული იქნება, ლუქის სწორი შეხამება და მნიშვნელოვანი ტენდენციების გათვალისწინება დაგეხმარებათ, რომ იყოთ გამორჩეული ნებისმიერ ადგილას და სიტუაციაში.

This slideshow requires JavaScript.

ტექსტი – დათა ალექსეევი
ფოტო – დათა ალექსეევი

© EIR for BEAUMONDE Magazine

მეორადი ტანსაცმლის ტენდენცია და 90-იანები

ტექსტი – დათა ალექსეევი / ჟურნალი ბომონდი

სტილი ერთგვარი კულტურაა, რომელიც ნათლად გამოხატავს ჩვენს ექპრესიულ მიდრეკილებებს. გასაკვირი არ არის, რომ მოდის მიმდევრები სისტემატურად ცდილობენ ინოვაციური მოდის ელემენტების ათვისებასა და შემდეგ საკუთარ სტილში გადმოტანას – მოდური თავისუფლება ხომ ინდივიდუალიზმის ჩამოყალიბების უტყუარი საფუძველია. უამრავი ხერხი არსებობს საამისოდ, რომ გამოიყურებოდე ტენდენციურად და გქონდეს საკუთარი სტილი, თუმცა დღესდღეობით ეს ხერხები მეტ-ნაკლებად შეცვლილია, ჩარჩოები კი გარღვეული. ჩვენს ხელში სრული თავისუფლებაა, დღეს ხომ ყველაფერი მოდაშია!
მოდა თავიდანვე ფუფუნების აღმნიშვნელი იყო… დიდი წვლილი მოდური სტანდარტების შეცვლაში ქართველ დიზაინერს, დემნა გვასალიას მიუძღვის. მან მოახერხა იმ სუბიექტური მიმდინარეობის დამკვიდრება, რომელიც ძალიან ბევრ შოპოჰოლიკს სწყუროდა. განიერი პერანგები, არაპროპორციული ჯემპრები, მაღალწელიანი ჯინსები – ეს ხომ ევროპული 90-იანების გადმონაშთია. დღევანდელი სტანდარტები არ აღიარებს განსაკუთრებულ გადაპრანჭვასა და შეფუთვას ძვირად ღირებულ სამოსში, თუმცა არც სტანდარტებს აწესებს. ეს ყველაფერი ბუნებრივად ქცეულ ტენდენციად შეიძლება მოვიაზროთ, რომელსაც ყოველთვის ჰყავდა და ეყოლება მიმდევარი.ალტერნატიული მოდა თავისუფალი სულის უპირობო სიმბოლოა, 90-იანი წლების სტილი – კომფორტული საშუალება მინიმალისტური მიმართულების მარტივად გამოსამჟღავნებლად.
დღესდღეობით მეორადი ტანსაცმლის ტენდენციამ ფართოდ მოიკიდა ფეხი საქართველოშიც. ამის მთავარი მიზეზი კი 90-იანი წლების კულტურასთან სიახლოვეა. დღეს ტენდენცია ერთ-ერთ სუბკულტურულ მიმდინარეობად გვევლინება, დიახ, ეს ახალი 90-იანებია, ანუ ყველაფერი ახალი კარგად დავიწყებული ძველია!

ძნელი არ არის იმ ვინტაჟური სამოსის აღმოჩენა, რომელიც გარკვეული მიმართულების ბატონობის პერიოდშია შექმნილი და შეიძლება რამდენიმე ათეულ წელსაც კი ითვლიდეს.
ნებისმიერი სამოსის მოდერნიზება და გემოვნებიანი ექსპერიმენტი კი უდავოდ დასაფასებელი და, რაღა თქმა უნდა, შთამაგონებელია.

მინდა წარმოგიდგინოთ განსხვავებული პროფესიის ადამიანები, რომლებისთვისაც მეორადი ტანსაცმლისა და 90-იანების შერწყმა გარკვეულ ექსპერიმენტთან და საინტერესო თავგადასავალთან ასოცირდება.

ნინი ბექაური / მოდის ბლოგერი

მოდის სფეროში მოღვაწე ადამიანების მიმართ ყოველთვის არის სტერეოტიპული დამოკიდებულება, თითქოს სისტემატურად ბრენდებით ვიმოსებით და მთავარი საზრუნავიც ეს არის ჩვენთვის. რეალობა სხვაგვარია, საერთოდ არ ვამახვილებ ყურადღებას ბრენდებსა და ძვირად ღირებულ სამოსზე, რადგან ვფიქრობ, გემოვნება იმდენად ინტიმური და არასადავო თემაა, არ ღირს ამ თვალსაზრისით მოდის სფეროში მოღვაწე ადამიანების განსჯა, მთავარია, სტილის შეგრძნება და ინდივიდუალიზმი. ძალიან ცოტა დროს ვხარჯავ იმაზე, რა შეიძლება ჩავიცვა. ყველაზე მარტივია, გეცვას ბრენდი და გამოიყურებოდე შესამჩნევად, მაგრამ ჩემთვის ბრენდების გარეშე სტილის ჩამოყალიბება უფრო რთული პროცესია.
სადა და მინიმალისტური სტილი მიყვარს, ბევრად კომფორტულია და გარკვეულწილად თავისუფლების შეგრძნებასაც მიჩენს. გლამური ნაკლებად მიზიდავს. ზემოთ ხსენებული სტერეოტიპის დასამსხვრევად კი საუკეთესო ვარიანტი მეორადი სამოსის აქტიური მოხმარებაა. რაც შეეხება 90-იანებს, მაშინ საქართველოში სამოსი ერთფეროვანი იყო, შესაბამისად, არ იყო ტანსაცმლის დიდი არჩევანი და, მგონია, ამიტომაც აქვს განსაკუთრებული გავლენა გასულ 90-იანებს თბილისის ქუჩებში. მეორადი კი ის ადგილია, სადაც ვაწყდებით იმ 90-იანებს, რაც დღეს ტრენდად იქცა.

გიორგი გოგოხია / მოდელი

ჩემი საქმიანობიდან გამომდინარე, ხშირად მიწევს კამერების წინ დგომა. საინტერესო პარალელს გავავლებდი პოდიუმიდან ქუჩის მოდამდე. ყოველთვის მიყვარდა სხვადასხვა დროის ტენდენციების არევა და ერთმანეთთან შეხამება. მოდის კვირეულის განმავლობაში, ყველაზე ხშირად ჩემი სტილით ვიქცევ განსაკუთრებულ ყურადღებას.
ვფიქრობ, 90-იანი წლების მიმართულებამ განსაკუთრებული შთაბეჭდილება მოახდინა ჩემზე. სასიამოვნოა გამოიყურებოდე ტენდენციურად ისე, რომ თავს ძალიან კომფორტულად გრძნობდე. ბევრი არ მიფიქრია, სად შეიძლებოდა შემეძინა ის სამოსი, რომელიც მონატრებას იწვევდა ჩემში.
მეორადი ტანსაცმელი საშუალებას მაძლევს, ბოლომდე გამოვხატო ჩემი შინაგანი სამყარო და ორიგინალურად გამოვიყურებოდე ალტერნატიული სტილის მეშვეობით.

სალომე ვეფხვაძე /კინო რეჟისორი

მხატვრების ოჯახში გავიზარდე. ბავშვობიდან ხელოვნება ჩემი ინტერესის მთავარ სფეროს წარმოადგენდა. მხატვრობას არ გავყოლილვარ, მაგრამ ამჟამად 9 მოკლემეტრაჟიანი ფილმი მაქვს გადაღებული. ხელოვნების ნებისმიერი სფეროს აღქმის სუბსტანცია ჩვენს ხედვაზეა დამყარებული. აქედან გამომდინარე, შემიძლია ვთქვა, რომ სტილიც ჩემს ცხოვრებაში ერთ-ერთი შთამაგონებელი რიტმია, რომელსაც კომფორტულად და თავისუფლად ვქმნი. ყოველთვის ხასიათიდან გამომდინარე ვიცვამ.

დიდ უპირატესობას ვანიჭებ ფერად ტანსაცმელს. ჩემთვის საინტერესო პროცესია ფერების შეხამება. შესაბამისად, თუ ორიგინალურად გამოვიყურები, დღეც უფრო პოზიტიური ხდება. ჩემი მიზანი არ მდგომარეობს განსხვავებულობაში, უბრალოდ ვცდილობ, ვიყო ის, ვინც ნამდვილად ვარ და მინდა, იმიჯმაც იმეტყველოს ამაზე. იშვიათად დავდივარ სავაჭრო ცენტრებში, უპირატესობას მეორად ტანსაცმელს ვანიჭებ, რადგან ვთვლი, რომ ვინტაჟი, აღმოჩენებისა და მრავალფეროვნების დიდი სამყაროა. მეორადი ტანსაცმელი იშვიათად მეორდება, რაც ჩემთვის პრივილეგიაა, 90-იანი წლები კი საუკეთესო ინსპირაცია ტენდენციურობისთვის.

დავით იმნაძე / ღამის კლუბის თანამშრომელი

90-იანი წლების თბილისში დავიბადე, რაც ნაცრისფერთან ასოცირდება ჩემთვის. სტილის თვალსაზრისით ეს პერიოდი საქართველომ გამოტოვა. მეტ უპირატესობას მუქ ფერებსა და ერთფეროვან სამოსს ანიჭებდნენ.
ალბათ, ზედმეტი იყო მოდაზე ფიქრიც კი. ჩემი იმიჯი მჭიდრო კავშირშია ცხოვრების სტილთან. კლუბში აღმოვაჩინე თავისუფლება, რომელსაც გარეთ ვერ შეხვდები. ვინტაჟური სტილისა და 90-იანების სინთეზი ჩემი ყოველდღიურობის საინტერესო თავგადასავალია. ვფიქრობ, რასაც ვიცვამ, ერთგვარი პროტესტის ნიშანია, რასაც თავისუფლად გამოვხატავ სტილის მეშვეობით.
მეორადი ტანსაცმელი ნამდვილად მეხმარება, გამოვიყურებოდე ორიგინალურად ნებისმიერ სტილში და არ ვგავდე სხვას.

ტექსტი – დათა ალექსეევი
სტილი – დათა ალექსეევი

ფოტო – სალი დუნდუა

ჟურნალი ბომონდი, აპრილის ნომერი , 2017
http://www.beaumonde.ge/dataalekseev